رباعيات

(1)

طار ابن آدم في الخيال لحظة افتكر
انه عايش فى السما ويا القمر
انه ارتوى وغسل همومه بالمطر
لما فاق لقي نفسه وحده ف الطريق
كل اللي عنده في الحياة
شنطة سفر

*****
(2)
يانجمة ياللى فى السما زى ما رسمتك بشوقي ارسميني
زى ما ف شعري كتبتك
زى ما ف لحني عزفتك
حاولي مرة تعزفيني
لما تشوفي صوت آهاتي..صدى اشتياقي وصوت حنيني
بلغي قلبي الغريب إما أجيله أو يجينى
*******
(3)
لو أحس إن اشتياقك قل لحظة
عن اشتياقي ولهفتي وخوفي عليك
لما ألاقى لهفتك نار حنينك
نورها غايب عن عينيك
هاأقدر اجبر نبض قلبي
ينكرك يقسى عليك
لو ها أعيش العمر أبكى
ايوة هاابكى
بس مش ها اندم عليك
****
(4)
شمعة واقفة بتنتحر في كبرياء
تدى حياتها وعمرها
وما بتنتظر لحظة وفاء
عرفت بفطرة طبعها
إن الحياة ألف وباء
آما ابن آدم
شاف حياته فى الأنا
م الألف للياء
***
(5)
بانجمة ياللى واقفة تطلى م الشباك عليا
خبي عيونك غمضي عنى شوية
واقفة تواسيني ولا شمتانة فيا
بكرة الشمس تطلع تحبسك
لاعمرى ها افتكرك
ولا تصعبي عليا

* * * *
(6)
مهما طال حلمك ف لحظة منه راح تفوق
النجوم واقفة فى سماها تنتظر لحظة شروق
عند أول ضى للشمس ها تدوب النجوم
والسما العتمة بهمومها
بكرة راح تصفا وتروق

***
(7)
ليه كل أحلامنا الجميلة بتنتهى بالانهيار
ليه نهاية حلمنا في كل مرة الانكسار
ليه نعيش بقلوب تحب
وكل نبضة فيها غنوه للحياة
بس لحن الغنوة دايما ينتهي ويا الغروب
لما بيموت النهار
****